Hrabra Lola

Nevjerovatni put slijepe skijašice od stravičnog pada do zlatne medalje

Mili Najt (Millie Knight) je u januaru 2017. godine stajala na početku skijaške staze i pripremala se za spust. Budući da je slijepa, oslanjala se na svog vodiča Breta Vajlda (Brett Wild) da je vodi do cilja.

Prevela: Vesna Drakulic

Izvor: bbc.co.uk

Foto: Millie Knight Facebook

Snijeg leti ispod njenih skija, a ona cijelo vrijeme čuje samo Bretov glas. Publika ne navija, svi ćute, zabranjeno im je da stvaraju buku kako ne bi ometali skijašicu i njenog vodiča.

Devetnaestogodišnja Mili ima samo pet posto vida. Periferan je i mutan, ali s vremena na vrijeme pred njenim očima bljesne narandžasta boja Bretove jakne, zahvaljujući čemu ona uspijeva da savlada sve prepreke i ostane na stazi. I stigla je do cilja, ona i Bret su postali prvaci na Svjetskom prvenstvu u alpskom paraskijanju. To je prva takva pobjeda za Englesku, publika oduševljeno aplaudira, ali sreća nije dugog vijeka, zato što Mili ne staje na cilju već pada pri brzini od 115 km/h!

Mili Najt (Millie KNight), Foto: Millie Knight Facebook

Pad

“Čuo sam je kako vrišti. Okrenuo sam se i odmah sam vidio koliko je loše. Krvi je bilo svuda po snijegu, pala je na led i povrijedila lice. Govorila je da ne može da diše”, ispričao je Bret za BBC.

Keli Fej (Kelley Fey), sportska psihologinja, takođe je vidjela kada je Mili pala.

“Bret je bio van sebe. Mili ne bi ni znala šta se dešava”, izjavila je Keli.

U bolnici su ustanovili da je Mili zadobila nekoliko posjekotina i modrica, ali drugih povreda očito nije bilo, pa su je doktori pustili i uspjela je da dođe na ceremoniju dodjele medalja. Sutradan je čak htjela i da učestvuje u superveleslalomu, ali je Keli odlučila da je povuku iz takmičenja. Iako se isprva zbog toga ljutila, Mili je uskoro shvatila da je to bila dobra odluka.

Foto: Millie Knight Facebook

Mjesec dana kasnije, ponovo je završila u bolnici. U južnoj Koreji je bila na pripremama za Paraolimpijske igre i na samom cilju se nekoliko puta prevrnula i pala na glavu. Dva pada u mjesec dana, a prije toga su, kako ističe Bret, njih dvoje zajedno skijali više od godinu dana i nikada nije pala. Kada je posrnula u južnoj Koreji, zbog potresa mozga je morala da ostavi skije.

Oporavak je podrazumijevao lagane vježbe u teretani i nipošto nije smjela da se preforsira, jer je to značilo nekoliko dana mirovanja. Tada je u nju počeo da se uvlači strah. Nikako nije mogla da se suoči sa planinama i zato se bacila na učenje, što je rezultiralo odličnim ocjenama. No, bez obzira na to koliko se trudila da se fokusira na druge stvari, u svojoj glavi je stalno ponovo preživljavala pad.

“Pitala sam se: ‘Jesam li sve to izgubila? Zar nikad više neću biti dobra kao što sam bila nekad?’”, otkrila je Mili.

Mili Najt (Millie Knight), Photo: Jason Dodd

Mlada i hrabra

Mili je prvi put stala na skije kada je imala samo šest godina. Upravo tada je ostala samo sa pet posto vida. Naime, infekcija joj je oštetila rožnjaču desnog oka dok je još bila beba. Pet godina kasnije, izgubila je vid i na drugom oku.

“Ne sjećam se da sam ikad vidjela, a moja mama oko toga nije pravila dramu. I ona je bila skijašica i jednostavno me je upisala u školu skijanja. Ja nikome u školi nisam rekla da ne vidim”, ispričala je Mili, “vidim dva-tri metra ispred sebe, ali mi je sve nejasno i mutno. Ne znam koliko su neke stvari udaljene od mene.”

Mili Najt (Millie Knight), Foto: Millie Knight Facebook

Kako joj je uspjelo da to sakrije i nauči skijati? Mili otkriva da je uvijek bila blizu instruktora i pratila ga na snijegu. Sa porodicom je išla na zimovanje i redovno je skijala. Kada je imala 12 godina, prisustvovala je ceremoniji otvaranja Paraolimpijskih igara u Londonu, i tada je poželjela da se nađe među tim sportistima. Nakon što se vratila u Kenerburi, kontaktirala je “Disability Snowsport UK” i počela da trenira skijanje. U to vrijeme vodič joj je bila njena majka Suzen (Suzanne).

Mili (Millie) i njena majka Suzen (Suzanne), Foto: Millie Knight Facebook

Sa 13 godina je ušla u razvojni tim Ujedinjenog Kraljevstva, a samo dvije godine kasnije se kvalifikovala za Paraolimpijske igre u Sočiju. Tako je postala najmlađa britanska učesnica na Zimskim paraolimpijskim igrama, a da cijela priča bude još ljepša, upravo njoj je pripala čast da nosi zastavu! Bila je premlada da se takmiči u svim skijaškim trkama, ali je osvojila peto mjesto u slalomu i veleslalomu.

Savršen vodič

Nakon Paraolimpijskih igara, Milin tadašnji vodič se povukao iz sporta kako bi mogao da studira. Tokom sljedeće sezone, Mili je pokušala da trenira sa osam različitih vodiča. Niko joj nije u potpunosti odgovarao. Tada je Milin razvojni trener Juan Benet (Euan Bennet) čuo za Breta Vajlda, skijaša kraljevske mornarice koji je skijao od svoje treće godine i odlučio da mu pruži šansu.

Mili Najt (Millie Knight) i Bret Vajld (Brett Wild), Foto: Millie Knight Facebook

Juan je Bretu rekao da će kao vodič morati da skija nekoliko metara ispred Mili, ali da neće biti vezani, već će komunicirati preko slušalica. Bret je pristao, ali Mili nije bila baš sigurna u njega, zato što je dotad radila samo sa starijim vodičima koji su donosili odluke i sve kontrolisali. Bret je imao samo 23 godine i nije znao šta radi, ali se brzo i lako prilagodio.

Prilikom spusta, Bret treba Mili opisivati teren od starta do cilja – da li je strm, ravan, da li je snijeg zaleđen, mekan ili neravan. Ukoliko Mili više ispred sebe ne može da vidi njegovu narandžastu jaknu, zasutavlja ga riječju “off”.

“Rekli su mi da je njen život u mojim rukama i da je ona moja odgovornost sve dok ne skine skije”, izjavio je Bret.

Mili Najt (Millie Knight) i Bret Vajld (Brett Wild), Foto: Millie Knight Facebook

Međunarodno takmičenje u Aspenu, Americi je bilo njihovo prvo zajedničko skijanje. Osvojili su sedam medalja, među kojima su bile i tri zlatne! Kraljevska mornarica je pristala na to da Breta oslobodi dužnosti na dvije godine, uz smanjenu platu, kako bi mogao Mili da odvede na Zimske paraolimpijske igre u Pjongčangu.

No, pad u južnoj Koreji je sve promijenio.

Suočavanje sa strahom

Godinu dana prije Paraolimpijskih igara, mladu skijašicu je strah paralizovao. Nikako se nije usuđivala da se spusti niz planinu.

“Prije pada sam bila sigurna u sebe zato što se nisam imala čega bojati. No, poslije sam samo mislila o tome zašto to uopšte radim ako će mi sve to donijeti još više povreda?”, otkrila je Mili.

Mili Najt (Millie Knight), Photo: Jason Dodd

Keli je s njom provodila sat i po dnevno kako bi joj pomogla da savlada taj strah. Ponekad su razgovarale tokom vožnje žičarom, a nekad su pričale o tome kako se, zahvaljujući govoru tijela Mili može osjećati i izgledati sigurnije.

“Bila je voljna da uradi sve što treba, no čim bi stala na skije, uplašila bi se. Čak i kada smo išli na blagi nagib, ona bi govorila da ne može, toliko se bojala. Tada sam znala da imamo ozbiljan  problem”, izjavila je Keli.

Foto: Millie Knight Facebook

Budući da ništa drugo nije pomagalo, ova sportska psihološkinja je odlučila da se zajedno sa Mili i Bretom vrati na mjesto na kojem je Mili pala i pomogne joj da se suoči sa svojim strahovima.

“Radilo se o tome da reprogramiramo moj mozak kako bi drugačije mislio o tome, da se promijene moje emocije vezane uz to”, objasnila je Mili.

Razumljivo, Bret je sebe krivio zbog toga što je Mili pala i izgubila samopouzdanje jer je smatrao da je on, kao vodič, trebalo da bude zamjena za njene oči.

Mili Najt (Millie Knight) i Bret Vajld (Brett Wild), Foto: Millie Knight Facebook

“Mili mi je kao mlađa sestra i želim da je zaštitim. Osjetio sam se bespomoćno zato što nisam mogao da joj pomognem. Jedino što sam mogao da uradim jeste da ostanem pozitivan u trenucima kada je ona gubila vjeru u samu sebe. Bilo je dana kada je bila uzrujana, a ja nisam znao šta da radim. Pokušao sam da ostanem pozitivan, ali to je bilo izvan moje kontrole. Problemi su bili u Milinoj glavi”, objasnio je Bret.

Neumorno su trenirali, a ujedno radili na međusobnom povjerenju i svom odnosu, kako na skijaškoj stazi, tako i izvan nje.

“Dok skijam jedino što čujem su Bret, njegove skije i komande. To je jedino na što se fokusiram”, izjavila je Mili.

Mili Najt (Millie Knight) i Bret Vajld (Brett Wild), Foto: Millie Knight Facebook

Zlatna medalja

U januaru 2018. godine stigla je vijest da su njih dvoje ušli u britanski tim za Pjongčang, a u Kanadi ih je čekala definitivna provjera toga da li je Mili savladala svoje strahove ili ne. Razloga za brigu nije bilo – u Kanadi su bili fantastični, skijali su bez ijedne greške i osvojili tri bronzane medalje. Za Mili je to bio dokaz da su njeni strahovi nestali.

“Mislim da sam sada mentalno mnogo snažnija. Kada se sjetim svog pada, nasmiješim se. Više o tome ne razmišljam i ne brinem se”, izjavila je Mili.

Mili Najt (Millie Knight) i Bret Vajld (Brett Wild), Foto: Millie Knight Facebook

Zlato koje su osvojili je nagrada za sav njihov trud i veza koja još više učvršćuje njihovo parnerstvo. Bretu uskoro ističu dvije godine odsustva iz Kraljevske mornarice i postavlja se pitanje hoće li moći da pripremi Mili za sljedeće Paraolimpijske igre. Ona sama kaže da nikoga drugog ne bi htjela da slijedi niz planinu i da bi bila veoma tužna ukoliko ona i Bret više ne bi mogli da skijaju zajedno. Oboje se nadaju da će to ipak biti moguće.

Pročitaj još

Od iste osobe

Najnovije