Nakon više od decenije u braku, shvatiš mnogo toga.
Dublje značenje ljubavi, posvećenosti, podrške, praštanja, frustracija i kompromisa. Nije sve divno i sjajno svakoga dana, ali postoje trenuci u kojima sam presrećna što sam u braku. Zato ih odlučujem podijeliti sa vama, jer život ne prestaje brakom, samo dobija potpuno novi smisao i transformiše se. Iz mog ugla na bolje.
Prvi razlog zašto je dobro biti u braku jeste taj da prestajete izlaziti na dejtove. Ne morate čekati muškarca da nazove, pitati se je li mu zaista stalo, baviti se suvišnim i neugodnim temama i razmišljati je li on taj ili ne. Ovako znate da ga već imate. Ne morate brijati sve dijelove tijela svakodnevno, jer se osjećate sasvim ugodno pored njega da budete onakve kakve želite biti. To podrazumijeva i podrigivanje i puštanje vjetrova pred njim, jer ste razvili osjećaj komfora i ne stidite se ničega pred njim, a to je ono što vaš brak čini opuštenim.
Osim toga, sada se nalazite u zajedničkoj kući ili stanu, a samim tim ste odlučili podijeliti i obaveze u kući na pola. Naučili ste biti jedno drugom pomoć i podrška pa vam nije problem očistiti kući dok on pravi ručak ili oprati veš dok se on bavi dječijom sobom i slaganjem igračaka. Jednostavno je, radite kao tim i to vam značajno olakšava svakodnevicu.
Obaveze oko djece su dio koji zajednički dijelite, jer ste oboje preuzeli ulogu roditelja u svom životu. Time vam je jednostavnije da se bavite i posvećujete jednom djetetu, dok se on igra ili razgovara sa drugim. Dobro je imati ga da vam grije noge noću, jer to je najbolji način zagrijavanja ikada. Osim toga, možete ga zagrliti i reći mu sve što poželite, pronaći utjehu i podršku u njemu.
Seks postaje bolji, jer se fokusirate na to da što više otkrijete o njemu, ali i on o vama i zato ne dozvoljavate sebi da upadnete u rutinu, već nastojite začiniti vaš seksualni život svakog dana nečim novim. Vaša emocionalna povezanost omogućava vam slobodu koja znači da fokus nije u samo seksualnom činu, već i u tome da se zbližavate emocionalno i tjelesno na različite načine. Nekada je sasvim dovoljno da vas zagrli i da se mazite.
Kada ste u problemu i kada vam treba pomoć, on je tu. Ne morate misliti i provjeravati hoće li biti ili ne, jer mu je stalo da vas podrži i pomogne vam, kao što i vi to radite za njega. Na stranu feminizam i sve ono što vi možete same, ali postoji nezanemariv broj stvari u kojima vam jednostavno treba muško. Ne morate sve same uraditi, a u konačnici i ne možete.
U braku ćete čuti kako ste prelijepe i u izdanjima kada to same sebi niste. To ne znači da će vam lagati, već da će vas voljeti i onda kada ste u svom najgorem izdanju, shvatajući da je i to dio vas. Ljubiti ujutru dok još niste otvorile oči i uz prvu kafu reći da ste upravo takve njemu najljepše.
Kada putujete imaćete mogućnost da se zamijenite za volanom, a ne da vozite same satima. Odmorićete i uživati u putovanju, dijelićete i avanture nastale na istom. Kada dođu djeca biće vam još draže, jer ćete se mijenjati u druženju i posvećivanju djeci dok druga osoba vozi. A onda u kriznim situacijama kada vas djeca nešto pitaju iskoristiti džoker:”Pitaj svog tatu” i preusmjeriti ih barem nakratko na njega.
Ali imati razumijevanje za stvari u kojima djeci treba mama. Zato što će on znati da ste različiti i da imate uloge koje vam nisu nametnute polom, ali koje biološki jednostavnije idu u nekim temama, kao što je seksualnost. Prednost braka je i u tome što imate nekoga pored sebe ko vas neće osuđivati za stvari koje radite, jer će shvatati da je to dio vašeg razvojnog puta i da se mijenjate, griješite i raditi stvari na koje nekada niste ponosne. Shvatiće kada je potrebno da samo ćuti i bude tu za vas.
Dobro je biti u braku i zato što učite konstantno nove stvari jedno o drugom. Razvijate se i rastete zajedno, baveći se međusobnim poticanjem i dajući podršku jedno drugom. Pred njim možete biti u potpunosti ranjive i shvatiti da će on biti onaj koji će pokazati snagu i zaštititi vas. To ne znači da ste slabije, već jednostavno da ste dovoljno svjesne svojih slabosti, koje i on ima, a kojih se ne boji pokazivati.
On će biti vaša pomoć kada ste bolesni, osoba koja kuva čaj i kojoj kuvate isti. Taj koji zna sve o vama, a koji vas neizmjerno voli, baš takvu kakva jeste. Koji vas razumije bez izgovorene riječi, sa samo jednim pogledom. Koji dijeli vaše strahove, nadanja i želje i izgrađuje odnos i sjećanja koja ga ohrabruju da bude još bolji zbog vas.
Biti u braku znači imati čitavu zajedničku istoriju dešavanja, uspomena i trenutaka u kojima sve što radite, ima većeg smisla. U dobru i zlu, bolesti i zdravlju, sve do kraja života, on je osoba sa kojom ste odlučile ostariti. I zato slavite svoj brak, jer je prepun izazova, uspona i padova, ali u konačnici vam daje sigurnost da imate nekoga i da taj neko ima vas.
